سلسلة الاختبارات : نصائح 📗exam: tips

سلااام بنات كيفكم مع الاستعداد للاختبارات 🌚؟

 

 بعمل سلسلة تدوينات فيها نصائح وسناكات واخر شي شوية تحفيز 🌚 ، اول تدوينة بنبداها بنصائح عن الاختبارات وكتبتها لي ولكم 🌸.

نبدأ ؟ 

- فالبداية ، انصحكم تعرفوا نمطكم عشان تقدروا تذاكروا بحسب النمط ، سمعي بصري او حركي ، لان مارح تقدري تذاكري بطرق البصريين وانتي سمعية والعكس صحيح 

 

هذي طريقة  للطنطاوي ، عشان تعرف نفسك ، اما الحركي او يسمى بالحسي ، يكون من اسمه مايجلس ، يتحرك دائما لما يشرح لك موضوع لازم يشرح ويتحرك ويمثل السالفة ، ممكن يتفاعل مع الدروس اللي فيها تجارب او استراتيجيات حركية ، 
طبعا كل شخص فيه الثلاث انماط ترا ، لكن ممكن فيه نمط او نمطين نسبتهم اعلى 📊 ، بعد كذا ابحثي عن الطرق اللي تساعدك في المذاكرة مع مايتماشى مع نمطك 🌞. 

- لازم تعملي لك جدول مذاكرة وانتي ادرى بطريقة مذاكرتك وموادك وصعوبتها وسهولتها ، ابدي من الاصعب او بالمواد اللي ماقبلها ايام يمديك تذاكري فيها ، حطي هدفك انك تختمين وابدي من بدري عشان يمديك تحققي هدفك 👌🏽✨. 

- في طريقة للمذاكرة ، انك تحطي مؤقت في جوالك بعد ٢٥ دقيقة ، وتبعدي الجوال عنك وتذاكري بتركيز اكبر ومن دون  تشتيت في هذي المدة ، وبعد مايرن المؤقت تاخذي بريك ماتزيدي عن ١٠ دقايق ، وبعدين كملي بنفس الطريقة ، المهم انك تزيدي تركيزك بشكل اكبر في هذي ٢٥ دقيقة 🕦.

 
- دائما جهزي اغراضك حق المذاكرة في شنطة او صندوق او حتى كيس ، كل اللي تحتاجيه من دفاتر وستكي نوت ، مؤشرات ، اله حاسبة ، اقلام ، مراسم ..الخ ، عشان ماتضطري تقطعي مذاكرتك عشانك ناسية شي .

- جهزي لك جو ، واقصد بالجو ، مكان مناسب + مرتب + ريحة حلوة  + اضاءة كويسة + اكل 😋.

- اعملي رياضة ، اتوقع ذي اكثر جملة نسمعها ، لكن منجد منجد فوائدها مرررررة كبيرة ، ما اقصد انك تشيلي حديد ومدري ايش ، لا ، يعني تمارين استرخاء واطاله وتحمية ، وممكن تمشي عشر دقايق او ربع ساعة كل يوم او اي رياضة كارديو لو رقص زومبا ، عشان الجسم يتنشط وعقلك يشتغل 🏋🏼 .

 
- انتي تعرفي اش اكثر اسلوب يناسبك ، اذا جيتي تكافئي نفسك كافئيها بطريقة ترضيها ، يعني ممكن انتي ترضي تكافئي نفسك بعد كل فصل ، ممكن في ناس بعد مايخلص الكتاب ، فيه ناس بعد كل اختبار ، او بعد الاختبارات كلها ، على حسب + نوع المكافأة  ، ناس ترضى بشوكلت وناس بمطعم وناس بطلعة وكذا 🌉. 

- انا صراحة فترة الاختبارات ما اشوفها فترة حرمان ، بالنسبة لي فترة عادية بزيادة ضغط شوي ، يعني معرف انا احس مو معقول احرم نفسي من الاجهزة والاشياء اللي احبها ، لكن اقلل منها وابعد عنها اكثر من الوقت العادي ، وازيد وقت مذاكرتي وتركيزي ، واللي يشغلهم الجوال دايم ، ممكن يعطوه احد حتى يخلصوا مذاكرة بعدين ياخذوه 📱.

- حالة الطفش اللي مالك خلق تمسكي الكتاب حتى لو قرأتي تحفيز من اليوم لين بكرة ، معليك هذي الحالة كلللنا نمر فيها ، اذا مرة شفتي انك تشغلي نفسك باي شي ومو قادرة تركزي ، توضي وصلي ركعتين ادعي الله فيها يفتح عقلك وقلبك ويسهل عليك ، بعد كذا امسكي ورقة او جوال او حتى سجلي صوت ، قولي كككل اللي يشغل بالك واللي تفكري فيه ، عقلك مو قادر يذاكر لانه مشغول بزحمة اشياء احيان ماتكوني واعية فيها ، بعد ماتخلصي التفريغ هذا روحي اشربي موبه او كلمي احد وارجعي ذاكري وان شا الله تمشي 💧 . 

- طبعا الدعاء دائماً ، بعد ماتخلصي مذاكرة استودعي الله كل معلوماتك وحفظك ، وادعي ان الله مايضيع لك تعب 🌿. - فيه شي انا محبه في هذي الفترة ، وهو النفاق اللي يصير ، يعني فجأة ناس تصير تصلي وتدعي وتبكي ، ان شا الله ربي يهديك بس كملي في حياتك كلها مو بس وقت الشدة والاختبارات ، ويعد ما تخلص الاختبارات ويجي وقت الرخاء ننسى الله ! ،مايجي كذا يعني برضو اصلحي نيتك لله دائماً ، عشان ربي يسخر لك ويفتح لك ابواب الخير من حيث لا تحتسبي🌜 . 

- ممكن قبل ماتبدي المذاكرة والاختبارات ، تدلعي نفسك بـ سبا ، حمام مغربي ، جلسة استرخاء وتأمل ، تعطيك طاقة للايام الجاية 🛁. 

وبكذا خلصت التدوينة الاولى من هذي السلسلة ، القاكم في التدوينات الجاية .

👋🏼