سلام بنات 🙋🏻، كيفكم ؟
هذي التدوينة رح تكون غير شوي ، رح تكون كلام من القلب للقلب 💜 .
اولا للمستجدات ، مبروك قبولك ياعيني بالجامعة والله يوفقك وتذكري دائما هذي الكلمة " قالتها لنا عميدة جامعتنا في اليوم التعريفي 🙂 ( انتي مميزة لانك حصلتي على هذا الكرسي في الجامعة ، لازم تكوني فخورة بنفسك وما تضيعي هذا الكرسي باللامبالاة ، لان غيرك يتمنى هذا الكرسي لكن ربي كتبه من نصيبك ولازم تحمدي ربك وتشكريه ).
الاستعداد النفسي 😙🍃:
طبعا اول ماتقرب الدراسة يبدأ التشاؤم ويبدأ التحبيط وتبدأ الحركات " اللي مالها داعي" ، هذا الشي رح يعطيك دفعة سلبية حتى لو كنتي متحمسة عشان كذا حاولي ماتقري ذي الاشياء واذا حصل وقريتها حاولي تبدليها بجرعة ايجابية وليش انتي تدرسي واش هدفك ووين تبغي توصلي وهكذا .
كمان ، الناس اللي يلاقو تحطيم بسبب تخصص اختاروه او مجال يحبوه ، خليك فخورة بنفسك اولاً 👑 ، ثانياً ماعليك في كلام الناس لو اش مايقولوا ، وحدة من استاذاتي مرة قالت ( مافي تخصص ماله مستقبل ، لو ماله مستقبل كان ماتعبت الجامعة نفسها وجالسه تدرسه وتطبع له الكتب وتجيب الاساتذه عشان فالاخير تجلسي في بيتكم) طبعاً صح ما انكر ان الخريجين اللي مالقوا وظايف كثير ، لكن انتي تقدري تكوني مميزة في تخصصك ، وكل ماكنتي تحبي التخصص كل ما ابدعتي اكثر ، فعلياً يقهروني البنات او حتى العيال كمان اللي يدخلوا تخصص مايعرفوا اش فايدته بالدنيا إما عشان اصحابهم او عشان شافوا احد دخله او يمكن قرأوا اسمه وقالوا اوكي ذا شكله سهل يلا بسجله رغبة اولى 🌚👞 .
المهم برجع للنقطة اللي فوق ، خليك فخورة بنفسك وتخصصك واختياراتك ، استخيري واستشيري وادخلي الشي اللي تحبي ، انا مثال عندكم ، كنت علمي فالثانوي وجبت نسبة عالية والحمد لله ، ولما جيت الجامعة دخلت ادبي ، كل اللي شافوني بالتحضيري يقولوا حراااام عليييك وكرفك مع استاذة الكيمياء والفيزياء فالثانوي ومدري ايش 😒 ، كنت اقول ابغا اتخصص علم نفس ، وفيه منهم ناس من عايلتي قالوا التخصص ماله مستقبل ، وناس كثير قالوا لي ذا تخصص مجانين 😂، كنت اعطيهم الابتسامة "التسليكية" ، هذا الشي انا مرتاحة فيه ومافي احد فالدنيا يخصه اش اختياراتي واش ابغى واش ما ابغى ، انا عندي حلم وعندي طموح ورح احط كل طاقتي واتمسك في حلمي عشان احققه وبإذن الله رح اوصل له 💪🏽 .
" I can do it "
مثل ما قلت ، انتي تقدري تكوني متميزة في تخصصك وتخلي لتخصصك قيمة وتخلي الناس تطلبك ، اما بانك تكملي دراسات عليا او تاخذي دورات وشهادات ، اهم شي لا تسمعي لكل كلمة تنقال لك ، اذا لقيتي احد منجد بينصحك نصيحة لها قيمتها خذيها بكل صدر رحب ، اما الناس اللي ماعندها شغل بس تمشي وترمي كلام ماتعرف اثره في غيرها ، هذول عطيهم "طاف" وخليهم هم و الجدار سوا🗿 .
دائما تذكري انك في نعمة وفيه غيرك كثير محروم منها ، فيه كثير ناس يتمنوا الدراسة ، اقرب مثال شوفوا كبار السن اللي ماتعلموا ، شوفوا كيف نظرة الحزن في عيونهم وفيهم حرقة لانهم ماتعلموا 😢 ، امنيتهم يرجع فيهم الزمن ويحاربوا كل شي كان في طريقهم بس عشان يتعلموا يقروا ويكتبوا ، ما بقول يتعلموا رياضيات وعلوم وجغرافيا ومدري ايش ، بس حلمهم قراءة وكتابة عشان يقروا كتاب ربي .
دائما تذكري بالعلم اللي جالسة تتعلميه انتي مو جالسة تفيدي نفسك وبس ، انتي تفيدي مجتمع ، تفيدي امة ، انتي بتعمري الارض اللي ربي جعلنا خلفاء فيها 🌍 .
كمان تذكري فضل العلم في الدين ، ربي جعل من يلمتس طريق فيه علم سهل الله له به طريق للجنة ، انتي متخيلة قد ايش كبيرة عطايا ربنا ، ربط لك العلم بالجنة ، وهذا الشي يدل ان العلم مو شي سهل وفيه مشقة ولا ماكان ارتبط بالجنة على طول 🌸🍃 .
اقتباس 📄:
" مهما كان تخصصك ومهما اختلفت اهدافك ، قرارك فالدراسة يساعد في تغيير العالم وجعله مكان افضل للعيش فيه ، انت مخطئ اذا كنت تعتقد ان قرار دراستك يهمك وحدك ويفيد مستقبلك انت فقط ، انت تدرس لتنقذ ارواح المرضى ، وتدرس لانقاذ كيان عائلة كاملة بدفاعك عن دخول اب بريء للسجن ، وتدرس لتصبح معلم اجيال وتقوم باسمى وظيفة -وظيفة الانبياء- ، انت تدرس لتطور الاتصال العالمي ، وتدرس لتطور البيئة من حولنا ، وتدرس لكي ترشدنا كيف نستفيد من الماضي ،
انت تدرس لتساعد في تطوير التكنولوجيا "
هذا الاقتباس لحاله يعطيني طاقة ايجابية بشكل كبير مهما كنت محبطة ☁️💜 .
، اخر شي ، انتي قوية 👸🏽💪🏽، انتي بنت والنساء عندهم قدرة عجيبة ولازم نثبت هذا الشي لتغيير نظرة مجتمعنا ، انتي اقوى مما تتخيلين ، بس اعطي نفسك فرصة ولا تحبطيها 👩🏻 .
☁️
، رح احط اقتباسات تحفيزية ، اقروها واتمنى لكم يوم سعيد ✨.
💚
💚
💚
💚
💚
💚
💚
💚
💚
💙💜
فعلياً يقهروني البنات او حتى العيال كمان اللي يدخلوا تخصص مايعرفوا اش فايدته بالدنيا إما عشان اصحابهم او عشان شافوا احد دخله او يمكن قرأوا اسمه وقالوا اوكي ذا شكله سهل يلا بسجله رغبة اولى 🌚👞 .
ردحذفمن جد يقهروا، مدونة رائعة والألوان اعطت نكهة للكلام، شكرا لابداعك