مرحبا بنات 🙋🏻
كيفكم مع نهاية الاجازة والاستعدادات لبداية الدراسة ؟🙂
الفترة ذي جهزت سلسلة للعودة للمدارس والجامعات.
في تدوينة اليوم رح اتكلم عن الملابس والاكسسوارات قطع اساسية يفضل تكون عندك لانها تمشي مع اشياء كثير وتقدري تنسقي فيها اكثر من ستايل 👯 .
اول شي انا احب الستايلات الكاجوال . مريحة وعملية ومرة لطيفة بصراحة 😩💞.
وطبعا اغلب شي بتكلم عن ملابس تنفع مع نظام جامعتي الملك عبدالعزيز💚 .
كل بنت خصوصا المستجدات ممكن تداومي اول اسبوع تشوفي نظام جامعتكم كيف وبعدها تشتري .
طيب
نبدأ بالملابس 👗!
* التيشرتات السادة : ممكن تاخذي اثنين او ثلاثة الوان محايدة مثل الاسود الابيض الرمادي ، وتنسيقها مع سلاسل او جاكيت ، شال او سكارف وغيره ، مره جميلة وخصوصا فالايام اللي مالك خلق تنسقي لبس او صحيتي متأخرة 🙄 ، تحصليها في ماكس وسنتر بوينت .
* قميص شيفون : بصراحة هي قطع مهمة لكن اهمها الشيفون الابيض السادة ، هذي مهمة مهمة مهمة 😁، تنفع مع اي شي فالدنيا تنفع للحر والبرد وكل شي ، تنلبس لوحدها او مع اكسسوارات او ممكن جاكيت ، ممكن بلوفرات فوقها ، مرة تنسيقاتها كثيرة ، صراحة احسها اهم قطعة فالدولاب :) .
* البلوفر : هذي برضو قطعة مهمة لان حتى عندنا في جدة على الحر الا نحتاجه عشان المباني باردة بشكل مو طبيعي لدرجة احيان نفسي اجيب بطانية معاي ☃️ .
* البناطيل الجينز+الاسود : هذي البنطلونين مرة حلوه وتنفع مع تيشرتات وقمصان كثير ، خذي شكل مرتب وتصير تنلبس مع الستايل الرسمي والكاجوال ، انا اخذت بناطيل من فور ايفير ٢١ وبصراحة مرة مرة جميلة وعمليه وحقت كرف وجامعة منجد 👍🏽 .
* تنورة ميدي : بصراحة هذي القطعة انا لسا ماجربتها لكن ان شا الله بجرب السنه ذي البسها واشوف ، اهم الالوان منها الاسود والرمادي ، تنلبس مع اغلب القمصان والتيشرتات .
*جاكيت رسمي : هذي القطعة مفضله لما يكون عندك عرض او مشروع وممكن تكون من باب التغيير ، الالوان يفضل لون محايد عشان يمشي مع اشياء كثير واكثر لون يفضل الاسود .
الحين نشوف الاكسسوارات 👑 !
*الجزم -اكرمكم الله- : انا اشوف الجزم الابوات اهم شي ، بصراحة عشان رجولك وظهرك ، وكمان في الاماكن المشمسة زي جدة :) عشان ماتصبغ رجلك ويجي نهاية السمستر وانتي كأنك عاملة تان ، وبالنسبة لي الشوز الابيض اهم لون يكون عندي مرة احبه يطلع الشكل جميل خصوصا اذا لبسك اغلبه غامق ، وافضل ماركة اخذت منهم شوز ابيض هي converse all star ⭐️ ، عندهم كل الالوان اتوقع وشوزاتهم تكرررف منجد تجلس معاك حوالي 5 سنين ، بصراحة مو خسارة الفلوس فيهم منجد 😩💙.
* الشنط : اهم شنطة اشوفها هي شنط الظهر، اريح واحسن لظهرك واكتافك ، فيه اشكال كثيييير منها وجميلة مرة ، ممكن تاخذي شنط الكروس بودي اذا ماعندك محاضرات كثير وكذا ، وشنط الshopping bag دايم يمدحوها تشيل اغراض كثير بس انتي حطي وماعليك،لكن بصراحة مدري اخاف على كتفي مرة احس تعور كل الوزن على كتف واحد🤕.
* الاكسسوارات : بصراحة اهم قطع من الاكسسواريز كله بالنسبة لي الساعة والحلق ، ممكن في اغلب الايام البس اساور ، السلاسل احيانا على حسب المزاج 🙄، الخواتم مااحب البسها فالجامعة كثير معرف ليش!
* نظارة شمسية : مرة مرة مهمة انا افتكر انكسرت نظارتي وجلست يومين مصدعة من الشمس 🌞، فعليا النظارة مرة مهمة تحمي عينك من الشمس وبعض الناس يلبسوها كااكسسوار، ممكن تركبي فيها السلسلة وتصيري تنزليها مثل السلسال وكذا .
👑
بكذا خلصت اهم القطع اللي ممكن تكون في دولابك للجامعة والدوام ، طبعاً حابه اقول انه انظمة الجامعات مو كلها نفس بعض ، واكرر داومي اول اسبوع وشوفي بنات جامعتك اش يلبسوا واش الممنوع واش المسموح وبعدها روحي اشتري .
اكتبوا لي اراءكم وشكرا لكم 🌸.
تعليقات
إرسال تعليق