سلام بنات ، كيفكم ؟
هذا اول موضوع رسمي لي فالمدونة اتمني يعجبكم ويفيدكم
رح اتكلم عن : الساعة البيولوجية او الساعة الحيوية
*اش يعني ساعة حيوية !
الساعة الحيوية فيه علماء قالوا انها منطقة موجودة فالدماغ ، بس انا احس انها شي مو محسوس يعني مثل المشاعر🙂 فهمتوا ؟
هي تتحكم فالهرمونات فتساعدك في تنظيم حياتك .
*اش فايدتها !
الساعة الحيوية هي تنظم لك وقت نومك وعدد ساعات نومك كمان وكمان تنظم وقت الاستيقاظ ، وفيه علماء قالوا انها تتحكم بالجوع وكذا .
*ليش ننظمها !
اول شي انا اشوف المنبهات مشكلة - مع اني استخدمها للاسف - ، والعلماء كمان قالوا كذا ، لانها تفجعك وتصحيك بفزع وممكن المنبهات الصاخبة تسبب سكتات دماغية 😰!
طيب لما ننظم ونضبط الساعة الحيوية نقدر نصحى بدون منبهات ،
وباضرار اقل ، واذا اعتمدنا عليها نقدر نقول بدون اضرار ان شا الله .
*كيف انظمها !
طريقة تنظيمها ممكن تاخذ وقت شوي يعني يومين ثلاث اسبوع ! على حسب طبيعة جيناتك وهرموناتك ، طبعاً انا رح ادمج بين طرق انا جربتها وطرق قرأتها فالنت .
- حددي ساعات النوم اللي تبغي تناميها : مثلا تبغي تنامي ٧ ساعات حطي في بالك انك رح تنامي ٧ ساعات واعطي الامر لعقلك الباطن انك الليلة تنامي ٧ ساعات ، كمان تحددي ساعات نوم كافية ، يعني تقريباً من ٧-٩ ساعات .
- قفلي كل الانوار في مكان نومك : قفلي الانوار والابجورات واذا فيه نور خارجي ممكن تحطي ستاير وكذا ، الجسم جدا يرتاح اذا اخذتي وقت نوم كافي في مكان مرة مظلم 😰.
- حطي في بالك الساعة اللي تبغي تصحي فيها : لازم تحددي كم الساعة بالضبببط اللي تبي تصحي فيها ، مثلا 5:30 خلاص لازم تأمري عقلك الباطن انك تصحي في ذا الوقت بالضبط ، مع الايام رح تضبطيها ، زي احيان لما يكون عندك موعد مرة مهم مثلا فالصباح اليوم الثاني ، وحطيتي منبه على 6 مو احيان تصحي قبل مايدق المنبه ! هذا لان ساعتك البيولوجية شغالة وانتي حطيتي في بالك انه لازم تصحي في ذا الوقت عشان الموعد المهم وجهزتي المنبه وكذا ، فلما تجي تتدربي حطي في بالك الوقت كأنه فيه شي مرة مهم تبغي تنجزيه .
- حاولي تعرضي نفسك لاي مصادر ضوء اول ماتصحي : لما تعرضي جسمك لمصادر النور هنا هرموناتك وخلاياك العصبية وساعتك البيولوجية تعرف ان هذا الوقت هو اللي لازم تصحي فيه ، فكذا رح تنضبط على اوقات النوم والاستيقاظ .
انا من بعد مانظمت ساعتي البيولوجية صرت جدا حساسة للمنبهات ، ما اعرف هو له علاقة او لا بتنظيم ساعتي ، لكن فعلاً حساسة لدرجة مزعجة احياناً ، يعني كثيير تصير لي اهلي يحطون منبهات وينسون اجهزتهم فالصالة او ممكن اخواتي فالغرفة انا اصحى وهم ماصحيوا 😭، ليه كذا ! -لكن صرت اقفلها وارجع انام وخلي مواعيدهم تروح عليهم عشان مايزعجوني مرة ثانية 😈 -
بحكيكم عن مرة اخواتي يبغوا يصحوا قبل صلاة الفجر وانا اقول لا تحطوا منبه انا رح اصحى وانتو مارح تصحوا حطوه في وقت الصلاة عشان نصحى نصلي يعني فيه سبب ، بس الا مصرين يصحوا قبل الاذان بساعة مدري ساعة ونص ، المهم تهاوشنا الين صار قبل الاذان بنص ساعة 😫، طبعا دق المنبه وهم نايمين ، صحيت انا كالعادة وجلست انتظرهم يصحوا وماقفلت المنبه ، اخر شي طفشت ماحسوا حتى ولا انزعجوا ولاا شي ، رحت صحيت وحدة فيهم وقلت لها قومي قفلي المنبه ، قامت قفلته ورجعت نامت طبيعي 😳، هو انتوا ليه حطيتوا منبه اصلا اذا ماتبغوا تصحوا، يعني اعجز اعبر احيان 🙂!
المهم صار من بعد هذاك اليوم حلف وتهديد انه مايحطوا منبهات في وقت انا نايمة فيه لانهم مارح يصحوا يعني 🙄.
وبس ان شا الله يعجبكم الموضوع ، طبقوا الخطوات ولا تنسوا تقولوا لي النتايج .
تعليقات
إرسال تعليق